Kupa e Botës 2030 do të sjellë përfitime të rëndësishme për Spanjën, si bashkorganizatore me Marokun dhe Portugalinë. Përfitimet tashmë janë llogaritur dhe po nxisin optimizëm në qytetet ku do të zhvillohen ndeshjet.
Qeveria spanjolle parashikon që organizimi i Kupës së Botës do të kontribuojë me 5.120 miliardë euro në PBB (prodhimi i përgjithshëm bruto) dhe më shumë se 5.500 miliardë euro nga shpenzimet turistike.
Sipas studimeve të përgatitura nga institucione akademike universitare, turneu pritet të gjenerojë një volum biznesi prej 5.120 miliardë eurosh dhe të krijojë 82.513 vende pune me kohë të plotë. Kësaj shifre i shtohen të ardhurat nga vizitorët specifikë të Kupës së Botës, të cilat pritet të tejkalojnë 5.500 miliardë euro dhe të shpërndahen në të gjithë territorin kombëtar, sipas parashikimeve të qeverisë.
Kostot
Sipas llogaritjeve, kostot totale të organizimit të FIFA-s do të jenë më të ulëta nga shifra bazë me rreth 238 milionë euro falë organizimit në Spanjë, Marok dhe Portugali. Ndër shpenzimet kryesore përfshihen:
- Operacionet televizive (320 milionë euro),
- Menaxhimi i personelit (240 milionë),
- Shërbimet teknike (128 milionë),
- Transporti (101 milionë),
Shërbimet për ekipet pjesëmarrëse (90 milionë).
Kursimet, në krahasim me shifrën bazë, janë ndikuar nga çmimet konkurruese, që kanë ulur shpenzimet në fusha si shërbimet teknike (47 milionë më pak), siguria dhe mbrojtja (32 milionë më pak), dhe teknologjia e informacionit dhe telekomunikacionet (31 milionë më pak).
Edhe pse modeli i organizimit në tri shtete dhe propozimi për 20 stadiume në 17 qytete mund të ndikojë në buxhet, kursimet e identifikuara pritet ta kompensojnë këtë.
Të ardhurat
Për sa u përket të ardhurave, vlera e të drejtave audiovizive dhe të marketingut të kandidaturës pritet të rrisë audiencën globale me rreth 5% krahasuar me edicionin e mëparshëm.
Në lidhje me shitjen e biletave dhe shërbimeve preferenciale, FIFA parashikon që të ardhurat bruto të tejkalojnë shifrën bazë me rreth 20% (më shumë se 190 milionë euro). Kjo është llogaritur mbi bazën e një ndarjeje të barabartë mes të ardhurave nga shitja e biletave dhe shërbimeve preferenciale.
Gjithashtu, FIFA ka vlerësuar të ardhurat shtesë nga objektet, si licencimet, shitjet me pakicë, dhe shitja e ushqimeve dhe pijeve, të cilat pritet të tejkalojnë shifrën bazë me rreth 47 milionë euro, falë kushteve të favorshme të tregut dhe traditës së fortë në këtë sektor.
Në rastin e ushqimeve dhe pijeve, të ardhurat pritet të tejkalojnë shifrën bazë me më shumë se 2,8 milionë euro.
