Përveç ndërtesave të përmbytura, rrugët janë ndërprerë për shkak të rrëshqitjeve të dheut dhe rreth 6200 familjeve iu është ndërprerë furnizimi me energji elektrike, e disave u është ndërprerë furnizimi me ujë.
Të paktën gjashtë persona kanë vdekur dhe dy të tjerë janë ende të zhdukur për shkak të përmbytjeve dhe rrëshqitjeve të dheut në Japoninë qendrore në 48 orët e fundit, raportojnë mediat japoneze, duke cituar autoritetet lokale.
Transmetuesi publik japonez NHK dhe media të tjera raportuan gjashtë të vdekur, me një zyrtar urgjence duke folur për “një të vdekur dhe pesë persona në arrest kardiak” pas shirave të rrëmbyeshëm në prefekturën Ishikawa, e cila tashmë kishte pësuar dëme të mëdha dhe ishte në zi kur u godit nga një tërmet i fortë në ditën e Vitit të Ri.
Terminologjia që përdor zyrtari është e zakonshme në Japoni kur bëhet fjalë për njerëz, vdekja e të cilëve mbetet për t’u përcaktuar nga një ekzaminues mjekësor.
Dy punëtorë të zhdukur të ndërtimit të rrugëve janë gjetur të vdekur në një rrëshqitje dheu, ndërsa dhjetëra kolegë të tyre shpëtuan mezi duke u strehuar në një tunel nëntokësor, raportojnë mediat japoneze.
Në Uajima, një qytet bregdetar në prefekturën Ishikawa, shtëpitë u përmbytën dhe autoritetet gjetën trupin e një burri nga një lumë.
Në Suzhou, një qytet në të njëjtin rajon, një burrë u gjet i vdekur në rrënojat e shtëpisë së tij, e cila u shtyp nga një rrëshqitje dheu.
Dy persona janë ende të zhdukur.
Gjatë fundjavës, dhjetëra lumenj dhe përrenj u vërshuan, duke shkaktuar sërish dëme në zonat e goditura tashmë nga tërmeti 7.5 ballë i 1 janarit, i cili la të paktën 374 të vdekur.
Agjencia Meteorologjike e Japonisë ka folur për “shira të rrëmbyeshëm të një shkalle të paprecedentë”: reshjet kaluan 540 mm gjatë fundjavës në Uajima. Reshjet ishin ndër më të mëdhatë që nga fillimi i regjistrimeve atje në vitin 1976.
Autoritetet lokale në prefekturën Ishikawa, e cila lahet nga Deti i Japonisë, u kërkuan rreth 110,000 banorëve të evakuojnë shtëpitë e tyre, ndërsa Agjencia Meteorologjike e Japonisë e vendosi rajonin në gatishmëri maksimale.
Përveç ndërtesave të përmbytura, rrugët u ndërprenë për shkak të rrëshqitjeve të dheut dhe rreth 6200 familje mbetën pa energji elektrike dhe disa pa ujë, sipas autoriteteve lokale.
Përmbytjet dramatike preku shumë banesa, si dhe tetë strehimore për viktimat e tërmetit në qytetet Uajima dhe Suzu, ku shumë prej atyre që humbën shtëpitë e tyre kur goditi tërmeti i Vitit të Ri.
Ushtria u thirr për të marrë pjesë në operacionet e kërkimit, shpëtimit dhe ndihmës në zonën provinciale, përgjatë Detit të Japonisë.
Nivelet e reshjeve në Japoni kanë thyer rekorde vitet e fundit, duke shkaktuar përmbytje dhe rrëshqitje dheu, në disa raste duke marrë jetë njerëzish.
Ekspertët theksojnë se ndryshimet klimatike po intensifikojnë shpeshtësinë, ashpërsinë dhe natyrën e paparashikueshme të këtyre fenomeneve.
