Juventus nuk di më të fitojë në kampionat. Në javën e 16-të të Serie A, skuadra e teknikut Thiago Motta nuk shkoi më shumë se një barazim 2-2 kundër Venezia, që mbyll renditjen. Për bardhezinjtë regjistrohet barazimi i katërt radhazi.
Në Allianz Stadium, në pjesën e parë, Gatti (19’) zhbllokoi ndeshjen duke devijuar në portë një goditje me kokë të Thuram, ndërsa një goditje me të djathtën nga Andersen përfundoi në traversë. Në pjesën e dytë, arbitri Giua anuloi një gol të Yildiz për prekje me dorë. Më pas, goditjet me kokë të Ellertsson (61’) dhe Idzes (83’) përmbysën rezultatin, por Vlahovic (95’) shpëton Juventus nga pika e bardhë në kohën shtesë.
UDINESE 1-3 NAPOLI
Në ndeshjen hapëse të javës së 16-të të Serie A, Napoli mposht 3-1 Udinesen. Në stadiumin Bluenergy në Udine, ndeshja fillon keq për ekipin e Contes, i cili e mbyll pjesën e parë në disavantazh, por rikthehet agresiv në pjesën e dytë për të barazuar dhe fituar.
Në pjesën e parë, Thauvin (22’) i jep avantazhin vendasve pas një ribatje të penalltisë së pritur nga Meret. Në pjesën e dytë, Lukaku (50’) barazon rezultatin, ndërsa një autogol i Giannettit (76’), pas një aksioni të shkëlqyer të Neres, i kalon miqtë në avantazh. Anguissa (81’) shënon golin që vulos fitoren e Napolit, i cili mban hapin ndaj Atalantës, duke mbetur dy pikë prapa saj.
CAGLIARI 0-1 ATALANTA
Atalanta fiton 0-1 ndaj Cagliarit në ndeshjen e vlefshme për javën e 16-të të Serie A, duke regjistruar fitoren e dhjetë radhazi në kampionat (për herë të parë në historinë e saj) dhe duke forcuar pozitat në krye të renditjes.
La Dea vuan shumë në pjesën e parë, por shpëtohet nga pritjet spektakolare të Carnesecchi-t. Në pjesën e dytë ndryshon ritmin dhe gjen golin vendimtar me Zaniolon (66’), i cili sapo kishte hyrë në fushë. Gasperini i shton presion Napolit dhe Interit, ndërsa trajneri Nicola rrezikon të përfshihet në zonat e nxehta të renditjes.
